जादुई शब्द

मास्टर जिनियस त्याच्या केदार मामाकडे गेला होता.

मामा म्हणजे जिनियसचा आयडॉल जो खूप हुशार तर आहेच, पण एक उत्तम व्यावसायिकही आहे. 

त्याने उत्तम शिक्षण घेऊन, फळ प्रक्रियेचा व्यवसाय सुरु केला.  

नातेवाईकांमध्ये या आधी कुणीही व्यवसाय करत नसूनही, केदारमामाने मात्र आपला उत्तम जम बसवला आहे. 

सुरुवातीला चढउतार आले, प्रश्न उभे राहीले, पण या सगळ्यातून मार्ग काढत आज त्याने यशस्वी उद्योजक म्हणून नाव मिळवले आहे.

मोठे झाल्यावर आपणही मामासारखा स्वतःचा व्यवसाय करावा, असे जिनियसला नेहमी वाटते म्हणूनच संधी मिळाली की तो मामाकडे जात असतो. 

त्याच्यासोबत राहून त्याच्या कामाचे निरीक्षण करत असतो. अर्थातच यातून नवनवीन गोष्टी शिकत असतो.

यावेळी मामाने जिनियसला जादूचे शब्द शिकवले, ज्यामुळे कोणतेही काम उत्तम व्हायला मदत होते.

त्याचे झाले असे, नेहमीप्रमाणे जिनियस मामा बरोबर त्याच्या कामाच्या ठिकाणी गेला होता. 

सुरुवातीला तेथील कामगारांशी मामा काहीवेळ बोलत होता. कामाविषयी सूचना देत होता. 

त्यानंतर तेथील थोड्या वरच्या पदावरील मंडळींसोबत चर्चा झाली.

आत्तापर्यतचे, यापुढील काम याविषयी बोलणी झाली. 

दुपारी काही व्यापारी मंडळी आली होती. त्यांच्यासोबत नवीन कामाची आखणी झाली.

घरी जाताना मामाचे काही मित्रमैत्रिणी भेटले. त्यांच्यासोबतही खूप गप्पा झाल्या.

दिवसभर मामाला इतक्या माणसांशी बोलताना बघून जिनयसला मजा तर वाटतच होती, पण इतक्या सगळ्यांशी बोलताना मामा दमत नाही, कुणावरच चिडत कसा नाही, कंटाळत नाही, याचे त्याला आश्चर्य वाटत होते.

घरी आल्यावर आपली शंका त्याने मामला विचारली.

मामा म्हणाला, "जिनियस मी आधी असा नव्हतो. चिडायचो, ओरडायचो पण त्यामुळे काम अजूनच बिघडायचे. 

मी जरी स्वतःचा व्यवसाय करत असलो तरी, सगळी कामे एकटा करु शकत नाही. अनेकांना बरोबर घेऊन काम करावे लागते. खूप माणसे जोडावी लागतात.

मग मी थोडा अभ्यास केला. स्वतःमधे बदल केला. हळूहळू काही गोष्टी शिकत गेलो. मला कळलं की जेव्हा मला अनेकांबरोबर काम करायचे असते, तेव्हा काही जादूचे शब्द मदत करतात."

"जादूचे शब्द ! गंमत करतो का माझी ? मी काही आता लहान नाही." जिनियस.

"अरे बाळ, जादूचे म्हणजे, असे की ज्यामुळे काम करताना छान वाटते आणि उत्साह वाढतो.

बघ म्हणजे मी कामावर गेल्यावर तिथल्या कामगारांना भेटलो. 

त्यांनी काल केलेल्या कामासाठी त्यांचे अभिनंदन केले आणि नवीन कामासाठी शुभेच्छा दिल्या. म्हणजेच तुमच्या भाषेत congratulation आणि thank you या शब्दांनी मला मदत केली. 

नंतर काही व्यापाऱ्यांशी बोलणे झाले. त्यांचे एक काम जरा उशीरा झाले. त्यासाठी मनापासून माफी मागितली. पुन्हा एक संधी देण्याची विनंती केली व अशी चूक परत होणार नाही याची खात्री दिली. म्हणजेच sorry, please आणि promise या शब्दांनी जादू केली.

काय मास्टर जिनियस काही समजते आहे का?"

" हो मामाश्री, तुमच्या या शिष्याला आज जादूच्या शब्दांचा खजिना मिळाला आहे. उगाच चिडचिड करुन किंवा रागावून आपली कामे होत नाहीत. उलट माणसे आपल्यापासून दुरावतात. एकमेकांबरोबर काम करताना किंवा खेळताना आनंद हवा असेल तर योग्यवेळी अभिनंदन, आभार, माफी, विनंती म्हणजेच congratulation, thank you, sorry, please, promise हे शब्द जादूच करतात. हे आता पक्क लक्षात ठेवणार आणि त्याचा उपयोगही करणार."

काय मित्रांनो, तुम्हीही वापरणार ना, हा जादुई शब्दांचा खजिना ?

नक्की वापरा. तुमची कामे तर छान होतीलच, पण त्याचबरोबर खूप सारे मित्रमैत्रिणीही यामुळे जोडले जातील.